इतिल्हने सम्यकया हलिं पताः ब्वयेकल

विश्व प्रसिद्ध हिरण्यवर्ण महाविहार, क्वाबहालया ग्वसालय् फागुन ३० व चैत्र १ गते जुइगु ‘यल इतिल्हने सम्यक महादान पर्व’ न्ह्याःगु संकेत कथं म्हिगः हलिपता ब्वयेकेगु ज्या जूगु दु ।
बुद्धप्रति कृतज्ञ जुया श्रद्धा एवं दानया उद्देश्यं थीथी विहारय् दिपंकर बुद्ध, तारा लगायत मेमेपिं द्यः, श्रामणेर, ब्रम्हचर्य भिक्षु, शाक्यभिक्षु व बज्राचार्य आदिपिन्त आमन्त्रण यानाः सम्यक महादान पर्व न्ह्याइ ।
फागुन ३० गते यलया १८ विहारया नापं चापागाउँ, बुंगमति, कीर्तिपुर, काठमाडौं, ललितपुर, भक्तपुरया महाविहारं नं दिपंकर बुद्ध, आर्यतारा व थीथी द्यःपिन्त पाटन दरवार क्षेत्रय् हयाः तइ । ३० गते बहनि ७ बजे न्ह्यानाः बहनि ९ बजे सांस्कृतिक बाजागाजा व लावालस्करसहित ज्येष्ठवर्ण महाविहार तंगःबहाः वनाः श्री बसुन्धरा देवीयात जात्रा यानाः पाटन दरवार क्षेत्रय् हये धुंकाः दक्व दिपंकर बुद्ध व मेमेपिं द्यः लस्करं मंगलबजारं नागबहाल यंकी । सम्यक महादान स्थल नागबहालया लुखां परम्परागत लसकुस वा स्वागत यानाः सकल द्यःपिन्त विराजमान याकाः बहनि १० बजे ज्याझ्वः न्ह्याका चान्हय् १ बजेतक निरन्तर दयाच्वनि ।
चैत्र १ गते अर्थात सम्यकया मेगु दिनय् सुथया ४ बजे निसें न्हिनय् १ बजेतक श्रद्धालु भक्तजनपिन्त दिपंकर बुद्ध व द्यपिन्त पूजाआजा तथा दर्शन याका नागबहाल परिसरया विशालरुपया धाःबाजा व बाँसुरी बाजा प्रदर्शन याइ । थुगु ज्याझ्वलय् अक्षयकोष स्थापना याय्त ग्वाहालि याम्ह यल महानगरपालिकायात नं सम्मान याइगु दु ।
थ्व लिपा भूमिशोधन पूजा यानाः दान बिइ सिधयेका बहनि ५ बजे दिपंकर बुद्ध व द्यःपिनि थःथःगु विहारय् लिहाँ वनी ।
थुगु ज्याझ्वः न्ह्याकेत सम्यक मरि छुइगु, नागबहालया प्रतिस्थापित बासुकी व चम्पक नागराजयात प्राण प्रतिष्ठा लिकायगु ज्याझ्वः जुइधुंकूगु दु ।
फागुन २८ गते हिरण्यवर्ण महाविहारया दशपारमिता आजु व विसपारमिता आःजु (जेष्ठ सदस्यपिं) बाजागाजासहित सम्यक महादानया निमन्त्रणा बिउ वनीगु जूगु दु ।