दिवंगत समाजसेवी चक्रमान डंगाेलया च्याक्वःगु लुमन्ति न्हिइ नारायण परिवार क्लबया ग्वसालय् येँ मनपा १२ वडाया २ दँतकया मस्तय्त पाैष्टिक आहार सर्वाेत्तम पीठाे इनेगुलिसें पाैष्टिक आहारसम्बन्धी अभिमुखीकरण ज्याझ्वः याइगु जूगु दु ।
नारायण परिवार क्लबया ग्वसालय् जुइगु अभिमूखीकरणलिसें सर्वाेत्तम पीठो वितरण ज्याझ्वलय् ब्वति काये मं दुपिसं थ्व हे असार २६ गते दुने नां दुतिनेत क्लबं इनाप याःगु दु ।
अभिमुखीकरण ज्याझ्वः व पाैष्टिक आहार इनेज्याझ्वः असार ३० गते शनिवाः औन्देस्थित दिपंकर बुद्ध विहार, बुद्धबारीइ जुइ ।
समाजसेवी चक्रमान डंगाेल क्लबया पूर्व नायः जुयादी । वय्कलं थुगु क्लबपाखें स्वास्थ्य सेवा, सञ्चार सेवालिसें सामाजिक सेवाया ख्यलय् यक्व ज्या यानादीगु दु । विशेषतः ल्याय्म्हतय्त समाजसेवाया ख्यलय् न्ह्यज्याकेत दिवंगत डंगाेलं भूमिका म्हितादीगु दु । समाजसेवी डंगाेल २०७२ श्रावण १ गते हृदयाघातया हुनिं मदुगु खः । वय्कः जँलास्येँसम्बन्धी ल्वचं नं पीडित जुयाच्वनादीगु खःसा जँलास्येँ (मृगाैला)या डायलाइसिस याकाः लिहाँ झायेत्यंबलय् हृदयाघात जुयाः मदुगु खः ।