रहेना मानन्धर
अतिकन ल्वःवंगु व देगः अले,
व चाकलिक घानातःगु आँय्पा पौया छेँ
ओहो, थः मांअबुं मस्त घय्सुना तः थें
स्वइपिनि हे मन लः लः धाल ।
सिँया कलात्मक शैली दुथ्याकातःगु
व ऐतिहासिक थाय्
काष्ठकलाया छगू मूवंगु लिधंसा
पुर्खाया शिपयात हानं छकः जीवन्त यानाबिल ।
व कारिगरीयात छ् यं धस्वाकाः सलाम याना ।
परिस्थिति नाप सामना यानाः
बाज्या बराजुपिसं धस्वाका थकूगु कलात्मक शैली
म्वाका तय्गु खःसा
सुं सपुत पलायन जुइ म्वाः
अभागी मां अबु धाय्के माली मखु ।
भौख्वाःचा खनेदुगु व देगःया गजू स्वस्वं
सर्गतय् हे विराजमान जू थें मन हर्षित जुल ।
थथे हे अदृश्य रूपय् विराजमान जुयाः
झी पुर्खां अवश्य न सुवाः ब्यूगु दै ।
ऐतिहासिक अस्तित्व म्वाकातःपिं
व देय्या सपुतपिन्त
मचाबलय् थें
व चुक दुने ब्वाँय् ब्वाँय् जुयाः
दुंकासा अले त्यलकासा
म्हिते ला धकाः मनय् लुल
झ्याः अले लुखाया खापा चायेकीबलय्
सिरिरिरि फसं दाइगु
मानौं बागमतिया फय् नापतुं वसन्त दुहां वः थें
मन हे ख्वाउँसे अले सिच्चुसे जुल ।
व ज्ञानया भण्डार बिलिबिली जाःगु
झी तापाःबाज्या घाँय् घाँय् बाजÞ्यापिन्सं
पक्का नं याउँक दुग्यंक
ध्यानमग्न जुइत दयेकुगु जुइमाः
टेकु दोभानय् च्वंगु व लक्ष्मेश्वर देगः!