येँ मनपाया मेयर बालेन शाहं शिक्षा व्यवस्थापन नियमावली, २०७४ कथं ब्वनेकुथिया चिं (लोगो) व नां तयेत इनाप याःगु दु । मखुसा कानुनी कारबाही यायेगु चेतावनी वय्कलं बियादीगु दु ।
येँ महानगरपालिका शिक्षा व्यवस्थापन नियमावली २०७४ या नियम ६९ व ७० लिसें नियम ७० या उपनियम १ व २ स ब्वनेकुथिया मौलिक नेपाली नां तयेत व ब्वनेकुथिया चिं (लोगो)य् एकरुपता हयेगु सम्बन्धी व्यवस्था याःगु दु । गुलिखे ब्वनेकुथिं नियम पालना मयाःगुलिं बालेनं आइतवाः सुथय् सामाजिक सन्जालपाखें नियम पालना यायेत इनाप याःगु खः ।
येँ महानगरपालिका विद्यालय शिक्षा व्यवस्थापन नियमावली, २०७४ या नियम ६९ स ब्वनेकुथिया चिं षट्कोणया जुइगु व विद्यालय व्यवस्थापन समितिं निर्णय यानाः उगु षट्कोणया दथुइ थःगु ब्वनेकुथिया ब्यागलं चिं तये फइगु न्ह्यथनातःगु दु ।
थुकथं हे नियम ७० या उपनियम १ य् ब्वनेकुथिया नां तयेबलय् समाज व देय्या निंतिं हे न्ह्यथनेबहःगु योगदान याःम्ह वा ऐतिहासिक व्यक्ति, देवी देवता, तीर्थस्थल वा प्राकृतिक सम्पदा आदिया नामं नेपालीपन वय्क नां छुइमाःगु च्वयातःगु दु । तर थ्व नियम प्रारम्भ जुइन्ह्यः थुगु नियम विपरीत नां छुइ धुंकूगु ब्वनेकुथिया हकय् थ्व नियम जारी जुइधुंकाःया निगूगु शैक्षिक सत्रया सुरुनिसें हे लागू जुइकथं पुनः नामकरण याये चाहे जूसा महानगरपालिकां स्वीकृति कायेमाः ।
नियम ७० या उपनियम २ स गुगुं संस्थागत ब्वनेकुथिं थःगु नामय् ‘पब्लिक’ खँग्वः स्वाये चाहे जूसा म्होतिं स्वब्वय् छब्व विद्यार्थी पूर्ण छात्रवृत्तिइ अध्ययनरत जुयाच्वंगु दयेमाः व गुगुं संस्थागत ब्वनेकुथिं थःगु नामय् ‘नेशनल’ खँग्वः स्वाये चाहे जूसा नेपाःया म्होतिं २५ जिल्लाया विद्यार्थी अध्ययनरत जुइमाःगु व्यवस्था दु । गुगुं संस्थागत ब्वनेकुथिं थःगु नामय् ‘इन्टरनेसनल’ खँग्वः स्वाये चाहे जूसां म्होतिं स्वब्वय् छब्व विदेशी विद्यार्थी दयेमाःगु व्यवस्था दु । ब्वनेकुथिया नांया ल्यूने विद्यालय, स्कुल वा पाठशाला खँग्वः स्वानाच्वंगु जुइमाः ।
तर थ्व उपनियम लागू जुइ न्ह्यः थुगु नियम विपरीतया खँग्वःत स्वानाः नां छुइ धुंकूगु ब्वनेकुथिया हकय् थ्व नियमावली जारी जुइधुंकाः निगूगु शैक्षिक–सत्रया सुरुनिसें हे लागू जुइकथं च्वय्या व्यवस्था पालना यायेत वा पुनः नामकरण यायेमाःगु व्यवस्था मेयर बालेनं लुमंकाब्यूगु दु ।
