नेपाःया निंतिं पाकिस्तानी दूतावासया ग्वाहालिं येँया बाँसबारीइ खुल्ला व्यायामशाला स्वंगु दु । येंँ महानगरपालिकाया ३ वडां बाँसबारी क्लवया प्राङ्गणय् खुल्ला व्यायामशाला दय्कूगु खः ।
‘व्यायामशालाय् अत्याधुनिक १६ थी ज्वलंत दु ।’ विपद् व्यवस्थापन समितिया कजि लिसें वडा ३ या अध्यक्ष प्रेम थापां धयादी, ‘दँ पुचः, सहरबासी मध्ये यक्वसिके खनेदुगु शारीरिक समस्या, स्वस्थ्य जीवन थुज्वःगु पक्षयात स्वयाः व्यायामशालाय् सामग्री व उपकरण तयागु दु ।’
जडान याःगु ज्वलनय् एअर वकर, एब्डोमिनल फिटनेस कम्बिनेसन, सिङ्गल व डबल स्किलिङ् मेसिन, सिङ्गल फिटनेस राइडर लिसेंया ज्वलंत दु । थथे हे लेग प्रेस, सिङ्गल रोइङ् मेसिन, पुल चेयर, डबल स्प्लिट मेसिन, लेग एक्स्टेन्सन एण्ड फिटनेस राइडर, लेग लिफ्टर, फ्यतुनाः व दनाः यायेगु ट्वीस्टर मेसिन थुकी दुथ्याः ।
खुल्ला थाय्या छ्यला सर्वसाधारण सकसितं आकर्षित यायेत व्यायामशाला दय्कागु वडाध्यक्ष थापां कनादीगु दु । महाराजगञ्जया शिवमार्ग, रानीबारी मार्ग व धारापाटीइ दुगु सामुदायिक सेवा केन्द्रया लागाय् नं थुगुसी हे थुज्वःगु सेवा सञ्चालन याय्गु नं वडाध्यक्ष थापाया धापू दु ।
वडा नं. ३ या बाँसबारीइ इको पार्क, ज्येष्ठ नागरिक पार्क व खुल्ला बाल उद्यान दु । थथे हे महाराजगञ्ज राष्ट्रपति भवनलिक्क शिवमार्गय् खुल्ला पार्क दु । धारापाटीइ कुमारी देगःलिसें ज्येष्ठ नागरिक पार्क दु । सामाखुशी सिथय् रानीबारी पार्क दु । थ्व पार्कया मर्मत सम्भार व सार्वजनिक उपयोग प्रवद्र्धनय् वडां ज्या यानाच्वंगु दु ।
वडाध्यक्ष थापायाकथं महानगरया वडा ३ व बुढानिलकण्ठ नगरपालिकाया वडा नंं ८ सिमानाय् लागू २२ पी सार्वजनिक तारबार यानाः संरक्षण याय्गु ज्या जूगु दु । थ्व थासय् सार्वजनिक पार्क दयेकेगु थापाया धापू दु ।
महानगरया वडा नं. ४ शंख पार्क, वडा १८ या पुष्पलाल पार्कलिसेंया थासय् खुल्ला व्यायामशाला दु ।
