न्हूदँ नापनापं थिमिइ बिस्का जात्रा नं क्वचाल । थिमिया बालकुमारीं २३ गू द्य:ख: जात्राय् दुगु ख: । धिमेया तालय् भुइसिन्ह: छ्वाका: न्ह्या:गु जात्रा थिमिया बालकुमारीनिसें लाय्कू व दिगुख्य:तक स्वक: चा:हिका: लाय्कुलीइ यंका: क्वचाय्कीगु ख: । थुगु जात्राय् थीथी थासं ह:गु द्य:ख: बालकुमारी थ्यंका: सकल द्य:ख: चूलाय् धुंका: प्यप्वा: दुगु चिलाख ल्ह्वने धुंका जात्रा न्ह्यागु ख: ।
जात्राया छन्हु न्ह्य: योमरी बालकुमारीया देग:या प्वालय् दुत छ्वय्गु होडबाजि जुगु ख: । स्थानियया धापू कथं योमरी प्वालय् दुत छ्वये फत धासा काय् बुइ धैगु जनविश्वास दु ।
अथेहे थुगु हे दिनय् मध्यपुर थिमि नगरपालिका अन्तर्गत थिमि, बोडे, नगदेश व दिगु याना: प्यंगु बस्तिया द्य: ख: क्वने त्वालय् व सिद्धिकालीइ छगु हे इलय् छगु हे दिनय् जात्रा जुइगु ख: ।
थुगु जात्राय् विष्णुविर अष्टमातृका अन्तर्गत विष्णुदेविया नेतृत्वय् जुइगु ख:सा सिद्धिकाली अष्तमातृकाया छगू पिठया जात्रा सिद्धिकालीया नेतृत्वय् थने जात्रा जुइगु ख: ।
थुगु जात्रा बहनिपाखे जुइगुलिं छेँखा पतिकं मिप्वा: ज्वना: पिहाँ वइगु ख: ।