वाङ्गमय शताब्दि पुरुष सत्यमोहन जोशीं नेपालभाषाया साहित्यख्यलय् लोक साहित्यया थपू यायेगु तातुना निस्वनातःगु लोक साहित्य परिषदं थुगुसिया करुणाकर सिरपा बाखं च्वमि शान्तराज शाक्ययात लःल्हागु दु ।
लोक बाखं यात ब्वना सामाजिक सन्जालया लिधंसाय् छेँखा छेँखा पत्तिकं न्यंकादीगु ज्वमदुगु ज्यायात कदर यासे वयकयात करुणाकर सिरपा देछानागु खः धका परिषदया नायः राजित बहादुर श्रेष्ठं कनादिल ।
ये महानगरपालिका उप मेयर मन्जरी शाक्य मूपाहाँ कथं झायादीगु उगु ज्याझ्वः ग्वसाखलःया नायः राजित बहादुर श्रेष्ठया सभानायसुइ न्ह्याःगु खः ।
मूपाहाँ शाक्यं अमर जुयावंम्ह संस्कृतिविद् सत्यमोहन जोशीया लोक साहित्य प्रति या मतिनायात लुमंका दिसे लोकसाहित्यविद् करुणाकर वैद्यया नामय् निस्वनातःगु सिरपालं सम्मानित जुयादीम्ह साहित्यकार शान्तराज शाक्यया बाख कनादीगु कलाया प्रशंसा यानादिल । वयकलं लोक साहित्यया उत्थानया ज्याय् यल महानगरपालिका व थःपाखें माःथाय् माःकथं ग्वाहालि यायेगु बचं बियादिल ।
ज्याझ्वलय् नेपालभाषा केन्द्रिय विभाग प्रमूख राजनलाल जोशी , यल महानगरपालिका वडा १२ या अध्यक्ष नारायण अवाले , सिरपाया दाता जयकर बैद्य , परिषदया संरक्षक अणुराज शाक्य पिन्सं नुगःखँ तयादीगु खः । करुणाकर सिरपालं सम्मानित जुयादीम्ह शान्तराज शाक्यं थःम्हं सामाजिक सन्जाल पाखें लोक बाखं कनेगु शुरु यानाबले थथे सिरपा वइ धका मति मतयागु खँ कनादिसे करुणाकर वैद्य थेंज्याम्ह लोक साहित्यविद् या नामय् निस्वनातःगु सिरपा अमर संस्कृतिविद् शताब्दि पुरुष सत्यमोहन जोशीया छेँय् सिरपा कायेखंगु यात थःगु तधंगु उपलब्धि धका धयादिल ।
ज्याझ्वलय् लसकुस न्वचु लोक साहित्य परिषदया दाँभरीं लक्ष्मी शोभा शाक्यं बियादीगु खःसा प्रमिला ताम्राकारं सुभाय् बियादीगु खः ।