शिक्षाविद् कथं तसकं नांजाम्ह अले साहित्यकारया रूपय् बिस्कं हे म्हसिका दुम्ह लक्ष्मण राजवंशीं च्वयादीगु बाखंया लिधंसाय् दयेकुगु बहु भाषिक संकिपा सनाखतया ट्रेलरया पितब्वज्या छगू ज्याझ्वःया दथुुइ सोमबार रसियन कल्चर सेन्टरय् जुउगु दु ।
सनाखत संकिपाय् मूकलाकार जुया म्हितादीम्ह नेपाःया ख्यालिजुजु कथं नांजाम्ह मदनकृष्ण श्रेष्ठया मूपाहाँ कथं झायादीगु उगु ज्याझ्वलय् शिक्षाविद् व साहित्यकार लक्ष्मण राजवंशीयात लुमंका च्वयातःगु लुमन्ति खँ मुनाया नं पितब्वज्या जुउगु खः ।
ज्याझ्वलय् सनाखत संकिपाया निर्देशक आर्यम नकःमिं लक्ष्मण राजवंशी छम्ह ज्वमदुम्ह साहित्यकार खःधका धासे वयकया बाखं लाशया सनाखत ब्वना थः तसंक प्रभावित जूगु खँ कनादिल । तसकं दुग्यंगु बाखनय् संकिपा दयेके खना थः तसकं लुधंगु खँ नं वयकलं कनादिल ।
सिद्धार्थ बनस्थली ईन्स्टिच्युटया ग्वसालय् जूगु उगु ज्याझ्वलय् ग्वसाःखलःपाखें जयदेव कृष्ण श्रेष्ठं लसकुस नुगःखँ तयादीगु खः ।
ज्याझ्वलय् समालोचक लक्ष्मीप्रसाद गौतमं लक्ष्मण राजवंशी स्मृतिग्रन्थयात कया थःगु नुगः खँ तयादीगु खः ।
अथेहेतुं परराष्ट्रविद् प्रा हिरण्यलाल श्रेष्ठ लगायतया बक्तापिन्सं मदुम्ह लक्ष्मण राजवंशीया थीथी पक्षयात कुलादीगु खःसा अनुराधा ढकालं लक्ष्मण राजवंशीयात लुमंका च्वयादीगु मुक्तक ब्वना न्यंकादिल ।
सिद्धार्थ बनस्थली ईन्स्टिच्युटया डा सर्वोत्तम श्रेष्ठया नायःसुइ जुउगु उगु सभाय् रूपक राजवंशीं सुभाय् नुगःखँ तयादीगु खः ।
उगु हे ज्याझ्वलय् ख्यालिजुजु मदनकृष्ण श्रेष्ठयात ग्वसाःखलःपाखें तःजिक अभिनन्दन नं याःगु खः ।