नेपालभाषा एकेडेमीया ग्वसालय् दँय्दसं बिया वया च्वंगु दान्यहिरा सिरपा थुगुसिइ वाङमय शताब्दि पुरुष अतिकं हनेबहम्ह अति विशिष्ट संस्कृतिविद् डा सत्यमोहन जोशीयात बिइगु जुउगु दु ।
नेपाःया साहित्य व संस्कृतिया ख्यलय् ज्वमदुगु योगदान दुम्ह डा जोशी नेपालभाषा एकेडेमीया पुलांम्ह चान्सलर खः सा थौंकन्हे उगु एकेडेमीया संरक्षक खः ।
एकेडेमीया चान्सलर यज्ञरत्न धाख्वाःजुं थः मांअबुया नामं निस्वनातःगु थ्व दान्यहिरा सिरपायात नेपालभाषाया वाङमय ख्यलय् छगू तःजिगु सिरपा कथ कथं कयातःगु दु ।
थ्व सिरपा न्हापा विशेष याना छगू साहित्यख्यलय् व मेगु साल संगीतख्यलय् बिइगु याना वया च्वंगु खःसा थुगुसिइ निसें दँय्दसं हे साहित्य व संगीतख्यलय् नियमित रुपं क्वछिउगु दु ।
अथेहेतुं न्हापा दान्यहिरा सिरपा व दान्यहिरा हःपाः सिरपा याना निम्हेसित निगु कथंया सिरपा बिया वया च्वंगु खः । थुगुसिइ निसें धाःगु दान्यहिरा हःपाः सिरपा मबिइगु निर्णय जुउगु खँ एकेडेमीया सदस्य सचिव डा पुष्पराज राजकर्णिकारं जानकारी बियादिल ।
सिरपा क्वछि या निंतिं साहित्य , संगीत व विज्ञान प्रविधि ख्यःया विज्ञ दुथ्यागु स्वंगु अलग अलग समिति निस्वंगु खःसा उगु हे समितिया क्वछिना कथं थुगुसिया दान्यहिरा सिरपाया साहित्य विधा पाखे वाङमय शताब्दि पुरुष अतिकं हनेबहम्ह अति विशिष्ट संस्कृतिविद् डा सत्यमोहन जोशीयात बिइगु जुउगु दुसा संगीत विधा पाखे संगीतख्यलय् प्यंगु दशकसिबें न्ह्यः निसें ज्वमदुगु योगदान बिया वया च्वंम्ह संगीतकार मनराजा नकःमि व विज्ञान प्रविधि ख्यः पाखेया सिरपा केशरी लक्ष्मी मानन्धर यात बिइगु जुउगु दु ।
क्वछिना कथंया थ्व स्वंगुलिं सिरपा थ्वहे वइगु कौलागा चर्हे कार्तिक ६ गते छगू ज्याझ्वःया दथुइ लल्हाइगु खँया जानकारी एकेडेमीया सदस्य सचिव डा राजकर्णिकारं बियादिइगु दु ।