नेवाः वाङमय ख्यलय् छगु प्राज्ञिक संस्थाया रुपय् निस्वनातःगु नेपालभाषा एकेडेमीया ज्यासना पुचःया न्हूधाः जुउगु दु ।
चान्सलर चित्तरन्जन नेपाली म्हं मफुगु हुनिं वय्कःया अनुपस्थितिइ सदस्य सचिव मल्ल के सुन्दरया नायःसुइ शनिवार जुउगु एकेडेमीया तःमुन्ज्याँ न्हूधाः याःगु खःसा न्हूम्ह चान्सलर कथं यज्ञरत्न धाख्वाःयात ल्यःगु खः ।
सर्वसम्मतया आधारय् जुउगु ल्यःज्यां ल्यःपिं दुजःपिनिगु पदभार विभाजन मंगलबार च्वंगु न्हूगु ज्यासना पुचःया बैठकं भाइस चान्सलर मल्ल के सुन्दर,सदस्य सचिवय् डा पुष्पराज राजकर्णिकार, दाँभरीं वीरप्रसाद भन्सारी व दुजलय् डा तेजरत्न कंसाकार, प्रा प्रेमशान्ति तुलाधर, डा. चन्द्रमान बज्राचार्य, शशीकला मानन्धर, नजरराम महर्जन, विजयरत्न असंबरे, दीपक तुलाधर, रजनीमिला महर्जन, राजित बहादुर श्रेष्ठया नापनापं ख्वपं महेन्द्र गोपाल कर्माचार्य, येँपाखें निर्मल बज्राचार्य यलपाखें अमरराज शर्मा, विद्या चित्रकारयात ल्यःगु दुसाः एकेडेमीया प्वंगु पार्षद पदय् नं न्हूपिं दुजः ल्ययेगु क्वछिउगु दु ।
