कारागार त्वाःथलाः थ्यंमथ्यं झिंस्वद्वः सिबें अप्वः कैदीबन्दीत बिसिवंगुलिं असुरक्षाया वातावरण जूगु धासें गोकर्णेश्वर नगरपालिकाया थीथी वडाय् टोल सुरक्षा समिति नीस्वंनाहःगु दु ।
समिति नीस्वनाः गस्तीनापं यानाच्वनाःगु धकाः वडा नं ५ या वडाध्यक्ष नारायणबहादुर सुवेदीं धयादीगु दु । नगरपालिकां गुंगूलिं वडाय् नगर प्रहरीयात गस्तीइ छ्यलातःगु दु । विशेष यानाः बहनीया इलय् नगर प्रहरीयात गस्तीइ खटे यानाःगु धकाः वय्कलं धयादिल ।
वडा ज्याकुथिं सरोकारवाला नाप सुरक्षा सम्बन्धय् सहलह नापं न्ह्याकूगु दु । प्रदर्शनकारीतय्सं च्याकूगु, स्यंकूगु, तछ्याःगु पोलया मत व सिसी क्यामेरा अनुगमन यानाः याकनं भिंकेज्या न्ह्याकेगु वय्कलं धयादिल ।
वडा ज्याकुथि, जोरपाटी स्वास्थ्य चौकी व जोरपाटी प्रहरी बिट दूगु भवनया सुचुकुचु लिसें भिंकेज्या नापं न्ह्याकूगु नगरपालिकां धाःगु दु ।