त्रिवि शिक्षण अस्पताल महराजगञ्जया फरेन्सिक विभागय् २८ म्हेसिया शवपरीक्षण पोस्टमार्टम क्वचाःगु दु ।
अस्पतालय् जेनजी प्रदर्शनय् मदुपिनिगु आः शवपरीक्षण जुयाच्वंगु खः । आःतक ४६ म्हेसिया शवपरीक्षणया निंतिं अस्पताल हःगु फरेन्सिक विभागया प्रमुख डा गोपाल चौधरीं जानकारी बियादिल । वय्कःया कथं २३ म्हेसिया शव थःथितिपिंसं यंकेधुंकूगु दु धाःसा न्हय्म्हेसिगु शव म्हसीके मफइगु अवस्थाय् दु । गुकिया निंतिं डिएनए परीक्षण आवश्यक जुइ । शव म्हसीके मफइगु अवस्थाय् धाःसा वा परीक्षण, फिङ्गरप्रिन्टपाखें शवपरीक्षण याइ ।
डा चौधरीं धयादिल, “शव गोली कःगु, मिं च्याःगु व ब्लड इन्जुरी जूगु खः । पोस्टमार्टमया निंतिं पौ वःपिनिगु शवपरीक्षण यानाच्वनागु दु ।”
थ्व हे दथुइ नवनियुक्त ऊर्जा, जलस्रोत नापं सिँचाइ, भौतिक पूर्वाधार नापं यातायात व सहरी विकासमन्त्री कुलमान घिसिङं मदुपिनि थःथिति व घाःपाः जूपिं नापलायेत शिक्षण अस्पताल थ्यंकादिल । अस्पतालय् आः २२ म्ह उपचार याकाच्वंगु दु ।