बालाजु ल्हुति पुन्ही (बाईसधारा) मेला व्यवस्थापन समितिं छगू पत्रकार सम्मेलन यानाः ल्हुति पुन्ही (बाईसधारा) मेला व खः शुचारु रुपं न्ह्याकेगु जानकारी ब्यूगु दु ।
चैत्र ३० गते शनिवाः बालाजुइ बाईसधारा मेला न्ह्याइगु खःसा ल्हुति पुन्हीनिसें न्यान्हुतक जात्रा जुइगु नं उगु पत्रकार सम्मेलनय् जानकारी ब्यूगु दु ।
बालाजु उद्यानय् जूगु उगु पत्रकार सम्मेलनय् मेला व खः जात्राया पृष्ठभूमि व महत्वयात कयाः छगू प्रेस विज्ञप्ति नं सार्वजनिक याःगु खः ।
प्रसिद्ध सितलामाई (प्याथ अजिमा), बुढानिलकण्ठ, बाईसधारा, थीथी देगः व प्राचीन बस्ती दूगु ल्हुतिया थःगु हे धार्मिक, पौराणिक, सांस्कृतिक व ऐतिहासिक महत्व कयाः प्रेस विज्ञप्तिइ न्ह्यथनातःगु दु ।
नेपाल संवत ८७५ य् बालाजुइ निछह«ा हिति मल्ल जुजु जयप्रकाश मल्ल स्थापना याःगु खः । लिपा रणबहादुर शाह नं वि.सं. १८५५ य् दथुइ तःधंगु ल्वहँ हिति निर्माण यायेधुंकाः थुकिया नां बाईसधारा जूवंगु खनेदु । गुगु उद्यान वि.सं. २०२१ स फुक्कसिगु नितिं सार्वजनिक याःगु खः ।”
थ्वहे पार्कय् दूगु बाईसधाराय् दँय् दसं चैत्र शुक्ल पुन्हीया दिं तःधंगु मेला जुइगु व उगु मेला स्वयेत स्वनिगःपाखें जक मजूसे देय् न्यंकं भक्तजनपिं वइगु याइ लिसें उगु दिं बाईसधाराय् म्वः ल्हुयाः उद्यानया पूर्वपाखें च्वंगु चीधंगु कुण्डय् भगवान विष्णुअर्थात् बुढानिलकण्ठया पूजा अर्जचना यानाः नागार्जुनया च्वकाय् च्वंगु विपश्वी बुद्धया प्रार्थना यायेत मनूत वइगु व उगु थासय् नागार्जुन महाद्यःया लिसें नागया प्रतिमा नं दु धकाः सार्वजनिक जूगु प्रेस विज्ञप्तिइ न्ह्यथनातःगु दु ।
प्रेस विज्ञप्तिइ धयातःगु दु, “थुगु हे दिं नागार्जुन पर्वतया च्वकाय् च्वंगु जामाचो बुद्धस्तूपा व नागार्जुन महाद्यःया दर्शन यानाः लिहाँ वयाः बालाजुया बाईसधाराय् म्वः ल्हुइबलय् सकतां चर्म ल्वय्पाखें मुक्त जुइगु व वहे थासय् च्वंगु प्याथ अजिमाया नामं नांजाःगु श्री शितला माईया दर्शन यायेबलय् बिफर ल्वय् पाखें मुक्त जुइगु जनविश्वास दयाः वयाच्वंगु दु ।”
खः जात्राय् विशेष यानाः प्यंगू खतय् छसिंकथं लौरी विनायक गणेद्यः (पुलांगु गुह्येश्वरी), श्वेत विनायक गणेद्यः बालाजु व लोलाङया जितगुरु गणेद्यः व बज्रयोगिनी द्यःपिंदइगु खः जात्रा ज्वःछि व थुगु जात्राया लिपांगु दिं लौरी विनायक गणेद्यः, श्वेत विनायक गणेद्यः, जितगुरु व वज्रयोगिनीया खःयात माःगु पूजाआजा व बाजागाजा लिसें सिन्हः जात्रा यानाः क्वचायेकेगु प्रचलन दयाः वयाच्वंगु दु धकाः विज्ञप्तिइ धयातःगु दु ।
येँ महानगरपालिका ल्हुति पुन्ही मेलाया नितिं झिगू लख व खः जात्राया नितिं न्यागू लख यानाः झिंन्यागू लख तका दां विनियोजन याःगु जानकारी नं पत्रकार सम्मेलनय् ब्यूगु दु ।
ल्हुति पुन्ही मेला व खः जात्राया नितिं थुगु दँ समितियापाखें याःगु तयारी थुकथं दु–
१) बाईसधारा उद्यान दुने च्वंगु नीनिगुलिं धारा व थुगु मेला व जात्राया नितिं थन दूगु धार्मिक, पुरातात्विक हलंज्वलंया धार्मिक व सांस्कृतिक महत्व प्रदर्शन यायेगु कथं तयारी याःगु दु ।
२) भक्तजन व पाहाँपिन्त व्यवस्थित ढंगं देगः दर्शन यायेगु नितिं नेपाल स्काउट, सुरक्षा निकाय, थीथी संघ संस्थात व स्थानीय स्वयंसेवकपाखें सेवा प्रवाहा यायेगु व्यवस्थापन याःगु दु । लिसें वइगु समस्याया समाधानया नितिं कमाण्ड पोष्टया व्यवस्था याःगु दु ।
३) आपतकालीन स्वास्थ्य सेवाया नितिं थीथी स्वास्थ्य संघसंस्थालिसेया सहकार्यस प्राथमिक उपचार व एम्बुलेन्सया व्यवस्था याःगु दु ।
४) त्वनेगु लः व व्यवस्थित चःबिया व्यवस्था याःगु दु ।
५) भक्तजनपिनिगु सुरक्षायात न्हापांगु प्राथमिकताय् तसें उगु दिं बालाजु चोकनिसें बालाजु उद्यान परिसर व बालाजु बाईपासतक उच्च सुरक्षा सतर्कताया नितिं नेपाल प्रहरी, सशस्त्र प्रहरी, ट्राफिक प्रहरी व महानगरीय प्रहरी बललिसे समन्वय याःगु दु ।
६) नेवाः नसाज्वलं व नेवाः परम्परागत हलंज्वलंया प्रवद्र्धनया नितिं स्टलया व्यवस्था याःगु दु ।
७) ज्याझ्वःयात प्रचारप्रसारया नितिं मेलाया दिं थीथी मिडियापाखें प्रत्यक्ष प्रसारण याइगु लिसें मेला लागाय् एलइडी स्क्रिनत तयेगु व्यवस्था याःगु दु ।
८) मेलाया दिं मेला व्यवस्थापनय् खटेजुइपिं सुरक्षा निकाय, स्वयं सेवक व पाहाँपिनिगु नितिं तुच्चा, नसाज्वलंया व्यवस्था याःगु दु ।
९) खः जात्रायात व्यवस्थित व प्रवद्र्धन यायेगु नितिं थीथी संघसंस्थालिसेसहकार्य याःगु दु ।
१०) स्थानीय कलाकार व नेपाल प्रहरी ब्याण्डपाखें मौलिक संस्कृतिया सांगितिक ज्याझ्वः न्ह्यब्वइगु जूगु दु ।
ज्याझ्वः क्वचायेधुंकाः मेला व जात्रा व्यवस्थापनय् ग्वाहालि यानादीपिन्त व सरोकारवाला सकलसित व संघसंस्थाया उपस्थितिइ छगू ज्याझ्वः ग्वसाः ग्वयाः थुगु दँया नितिं मेला व जात्राया सकतां ज्याझ्वः क्वचायेकीगु जूगु दु ।