श्रम रोजगार तथा यातायात मन्त्री मा. प्रेमभक्त महर्जनया मूपाहाँसुइ नेवाः पत्रकार राष्ट्रिय दबूया झिंस्वक्वःगु दँमुँज्या थौं थिमि ब्याङ्क्वेटय् क्वचाल ।
ज्याझ्वलय् नुगः खँ तयादिसें प्रदेश सभा मदुगु जूसा नीति निर्माणया तगिमय् आदिवासी जनजातित मथ्यनीगु खँ तयादिल ।
ज्याझ्वलय् वाङमय शताब्दी पुरुष सत्यमोहन जोशी स्मृति पत्रकारिता पुरस्कार मेट्रोएफएमया वरिष्ठ पत्रकार जुजुमान महर्जनयात झिद्वः तका दांलिसें लःल्हाःगु दु ।
थुकथं हे नेपाःया न्हापांम्ह त्रिपिटकाचार्य लिसें वि.सं. २००१ सालय् तत्कालीन श्री ३ महाराज जुद्ध शम्शेरं देश निकाला याःपिं च्याम्ह भिक्षु मध्ये छम्ह भिक्षु कुमारकाश्यप महास्थविरया नामय् भिक्षु कौण्डन्यं स्वनादीगु भिक्षु कुमारकाश्यप स्मृति पत्रकारिता सिरपाः नेपाल मण्डल टेलिभिजनया क्रियाशील पत्रकार रामराजा बज्राचार्य, ज्ञानदेवी– मणीरत्न स्मृति पत्रकारिता सिरपाः नेवाःएचडी टेलिभिजनया वरिष्ठ पत्रकार नवीन जोशी, ज्ञानज्योति – लक्ष्मीप्रभा स्मृति पत्रकारिता सिरपा ख्वपया जनसञ्चार टेलिभिजनया पत्रकार सुरेश सैंजु, बाबुराजा ज्यापु फोटो पत्रकारिता सिरपाः येँया फोटोपत्रकार मनोजरत्न शाही व श्रीरामस्मृति पत्रकारिता सिरपाः चितवनया पत्रकार निशा श्रेष्ठयात लःल्हाःगु दु ।
मूपाहाँ महर्जनं सिरपाःया दसिपौ लःल्हानादीगु खः ।
ज्याझ्वलय् नेवाः पत्रकार राष्ट्रिय दबुुलिइ आवद्ध जुयादीपिं नेपाल आदिवासी जनजाति पत्रकार महासंघ (फोनिज)या थीथी तगिं व नेपाल पत्रकार महासंघया थीथी तगिमय् निर्वाचित जूपिन्त भिंतुनापौ लःल्हाःगु खः ।
दबूया न्वकु सुरेन्द्र भक्त श्रेष्ठं लसकुस याःगु ज्याझ्वलय् निवर्तमान नायः सुरजवीर बज्राचार्य, संस्थापक नायः श्रीकृष्ण महर्जनं दबूया ज्या व लँपुया बारे नुगःखँ तयादीगु खः ।
ज्याझ्वलय् सिरपाःया दातापिं मोतिशान्ति शाक्य, विजयराम कर्माचार्य व भिक्षु कोन्दन्यं थःपिसं लःल्हानादीगु सिरपाःया बारे नुगःखँ तयादीगु खः ।
सिरपाः त्याकादीपिनिपाखें नवीन जोशीं नुगः खँ तयादीगु खः । दबूया मूछ्याञ्जे केके मानन्धरं न्ह्याकूगु ज्याझ्वः दबूया नायः नृपेन्द्रलाल श्रेष्ठया सभापतित्वय् जूगु खः ।