हलिं नेवाः गुथिया नेतृत्वय् सुरेश सैंजु

फम्पि÷हलिं नेवाः गुथिया झिंखुक्वःगु दँमुँज्या व च्याक्वःगु तःमुँज्यां सुरेश सैंजुया नेतृत्वय् न्हूगु ज्यासना पुचः ल्यःगु दु ।
थनया झम्केश्वरी प्रांगणय् थ्वहे चिल्लाथ्व नवमि (फागुन २४) स जूगु गुथिया तःमुँज्यां सैंजुया नेतृत्वय् सर्वसम्मत न्हूगु ज्यासना पुचः ल्यज्या जूगु ल्यज्या कवःया कजि अधिवक्ता नरेश श्रेष्ठं घोषणा यानादीगु खः । सर्वसम्मत जूगु न्हूगु ज्यासना पुचःया न्वकुइ अमरकाजी श्रेष्ठ, मूछ्याञ्जे धर्मनारायण महर्जन व दांभरिं सूर्यलक्ष्मी महर्जन ल्यःगु दु ।
थुकथं हे दुजलय् सुवर्ण मानन्धर, डा. रसिला अमात्य, तुल्सीनारायण श्रेष्ठ, रामकृष्ण महर्जन, दीपक मुल्मी, विणु कर्माचार्य व ममता शाक्य ल्यःगु खः ।
न्हूगु ज्यासना पुचःया निंतिं वंगु चिल्लाथ्व षष्ठी (फागुन २१) गते बुधवाः जन चिकित्सालय न्ह्योखाय् जूगु कचा नायः, केन्द्रीय प्रतिनिधि व कचापाखें झाःपिं पार्षदपिसं सर्वसम्मतकथं न्हूगु ज्यासना पुचः ल्यःगु खः ।
निर्वाचित जूगु न्हूगु ज्यासना पुचःया घोषणा जुइ न्ह्यः गुथिया मूनायः विनोद महर्जनया नायःसुइ तःमुँज्याया उलेज्याझ्वः न्ह्याःगु खः ।
दक्षिणकाली नगरपालिकाया मेयर मोहन बस्नेतया मूपाहाँसुइ जूगु ज्याझ्वलय् नुगःखँ तयादिसें वय्कलं दक्षिणकाली नेवाः, तामाङ्ग, खय्, ब्रम्हू सकसियां बस्ती दुगुलिं थनया सांस्कृतिक सन्तुलन यानाः थः न्ह्यज्यानाच्वनागु खँ तयादीगु खः । वय्कलं दक्षिणकालीया मू म्हसीका जुयाच्वंगु थीथी जात्रापर्वत नेवाःतय्सं हे न्ह्याका वयाच्वंगु खँ कुलादिसें नेपाःया संस्कृतियात ल्यंकेगु निंतिं नेवाःतय्सं म्हितावयाच्वंगु भूमिकायात लुमंकादिल ।
नेवाः भासं हे ज्याझ्वलय् नुगःखँ तयेगु झ्वलय् वय्कलं गुगुं नं संगठन बांलाकेत थवंथवय् सहलह ब्याकाः न्ह्याः वन धाःसा जक बल्लाइ धयादिल । थुकथं हे वय्कलं थौंकन्हय् देसय् छम्ह व्यक्ति न्ह्यःने तयाः न्ह्यात धाःसा बांलाइगु बिचाः वयाच्वंगु तर अथे मखसें झीपिं मिले जुयाः हे जक देय्या विकास सम्भव जुइगु बिचाः तयादिल ।
ज्याझ्वलय् नुगःखँ तयादिसें गुथिया संरक्षक शान्त प्रकाश श्रेष्ठं हलिं नेवाः गुथिपाखें दँय्दसं छगू नेवाः बस्तीइ वनाः अनया रहनसहन व अनया नेवाःतय्गु अवस्था सीके कथं थीथी गामय् वनाः गुथिया दँमुँज्या व तःमुँज्या न्ह्याकेगु यानावयाच्वनागु खँ कनादिल । थुकियात वय्कलं त्वाय् चिनेगु नेवाः परम्परालिसे स्वानाः थीथी थासय् च्वंपिं नेवाःत छगू गामय् वयाः अनया लजगाः, उत्पादनया बारे सीकेगु छगू ह्वःताः जूगु नं वय्कलं कनादिल ।

ज्याझ्वलय् सभानायःया थासं नुगःखँ तयादिसें मूनायः विनोद महर्जनं हलिं नेवाः गुथिं सुं नं नेवाःत आर्थिक रुपं ल्यूने मलायेमा धइगु ल्याखं ज्याखँ न्ह्याकावयाच्वंगु व थुकियात अझ धिसिलाक्क न्ह्यज्याकेत न्हूगु ज्यासना पुचलं बांलाक ज्या न्ह्याकीगु भलसा दुगु खँ तयादिल ।
उलेज्याझ्वलय् दक्षिणकाली नगरपालिकाया उपप्रमुख बसन्ती महर्जन तामाङ्ग, दक्षिणकाली नगरपालिका ६ वडाका नायः शैलेशमान मानन्धर, समाजसेवी ज्यापु संस्कृति विकास कोषया न्वकु सन्तकुमार महर्जन, समाजसेवी लक्ष्मण गमाललिसेंया उपस्थिति दुगु खः ।
उगु हे ज्याझ्वलय् हलिं नेवाः गुथियात धिसिलाक्क न्ह्यज्याकेगु निंतिं विशेष योगदान बियादीम्ह हलिं नेवाः गुथिया संस्थापक दुजः लक्ष्मी श्रेष्ठयात विशेष हना लःल्हाःगु खः ।
थुकथं हे उगु हे ज्याझ्वलय् गुथिया जःलिसें पत्रकारिता व आमसञ्चार विषयस विद्यावारिधी यानादीम्ह डा. विधुप्रकाश कायस्थ, कृषि इञ्जिनियरकथं २३ दँ प्राध्यापनया अनुभव नापं न्हूगु सिँचाइ प्रविधि विकास याःम्ह व नेपाल संवत्या न्हिल्याः आखलं जक च्वयेगु यानावयाच्वंगुली अंकं नं च्वय् जीकेगु व कम्प्यूटर प्रणाली दुथ्याका नेपाल संवत्यात डिजिटल युगय् पलाः न्ह्याकेगु नेपाल संवत् तिथिया कोडिङ्ग – डिकोडिङ्ग (नेसंतिकोडि) सुत्र लुयेकादीम्ह प्रा. डा. भगवानदास मानन्धर, फम्पि देय्या सांस्कृतिक संरक्षण निंतिं अनवरतरुपं योगदान बियावयाच्वनादीम्ह सांस्कृतिक बाजं गुरू मोहन नारायण बलामी, नेवाःतय्गु भाषा, संस्कृतियात अन्तर्राष्ट्रिय ख्यलय् प्रचार यायेगु ज्याय् तिबः बियावयाच्वनादीम्ह नेवाः पुचः यूएईया महासचिव कुमार बलामी, पद्म कन्या क्याम्पसपाखें नृत्य (हुलाप्याखं) विधाय् न्हापांगु ब्याय्चय् स्नातकोत्तर पास यानादीम्ह कलाकार अनिता रञ्जित, क्रिकेट कासामिपिं कन्चन श्रेष्ठ व अस्मिना कर्माचार्यपिन्त हनेज्या याःगु खः ।
उलेज्या न्ह्यः गुथिया इट्टे कचां हःगु लाखेलिसेंया सांस्कृतिक झाँकिं फम्पि देय् चाःहिलेज्या याःगु खः ।
उलेज्याझ्वलय् फम्पिया स्थानीय कलाकारपिनिलिसें नाःजाःम्ह कलाकार रामकुमार साय्मि व गौतमदास मानन्धरपिसं म्ये न्ह्यब्वयादीगु खः ।
हलिं नेवाः गुथिया मूछ्याञ्जे अमरकाजी श्रेष्ठं न्ह्याकादीगु उलेज्याझ्वलय् हलिं नेवाः गुथि फम्पि कचाया कजि श्रीकृष्ण मानन्धरं लसकुस यानादीगु खः । थुकथं हे फम्पिया म्हसीका कःघानातःगु स्मारिका मञ्चय् आशिन पाहाँपिं व ब्वति कयादीपिं सकसिनं क्यनाः विमोचन यायेगु ज्या जूगु खः ।