विश्व सिमसार दिवस हनः

‘झीगु मंकाः भविष्यया निंतिं सिमसार लागाया संरक्षण’ नारा ज्वना थौं विश्व सिमसार दिवस न्यायेका च्वंगु दु । तःच्वकं जुयाच्वंगु सिमसार लागाया विनाश दिकेत जनचेतना अप्वयेकेगु व सिमसार लागाया संरक्षण व पुनःस्थापनाया प्रवद्र्धन यायेगु तातुनाः थ्व दिवस न्यायेकाः वयाच्वंगु दु । संयुक्त राष्ट्रसंघपाखें सनं २०२१ अगष्ट ३० य् दँय्दसं फेब्रुअरी २ खुन्हु हलिंन्यंकं सिमसार दिवस न्यायेकेगु क्वःछ्यूगु खः । सन् १९७१ य् क्यास्पियन समुद्रया सिथय् च्वंगु इरानया सहर रामसारय् ग्वसाःग्वःगु अन्तर्राष्ट्रिय महत्वया सिमसारसम्बन्धी महासन्धितय्त नालाकाःगु न्हिया लुमन्तिइ दिवस न्यायेकेगु यानावयाच्वंगु खः । संरक्षित लागाया घोषणा, प्रभावकारी नीतिया छ्यलाबुला व ज्ञां कालबिलपाखें उगु महासन्धिं देय्तय् थःगु जलाधार लागाया संरक्षण व दिगो उपयोगया निंतिं माःगु पलाः न्ह्याकेत सक्षम दयेकेगु तातुनाः दिवस न्यायेकेगु यानावयाच्वंगु दु । मुक्कं सच्छि व ७२ देय्तय्सं नालाकाःगु थ्व महासन्धिइ दुथ्यापिंं देय्तय्सं नं अन्तर्राष्ट्रिय महत्वया सिमसार लागाया धलः (रामसार लागा) य् म्होति छगू जलाधार दुथ्याकेमाःगु नियम हे दु । आः नेपालय् कोशी टप्पु वन्यजन्तु आरक्ष, रारा तःपुखू, माईपोखरी, फोक्सुण्डो तःपुखू, बिसहजारी तःपुखू, घोडाघोडी तःपुखू, सिलु तःपुखू, गाक्यो तः पुखू, जगदीशपुर जलासय व पोखरा उपत्यका व थुकिया गुंगू तःपुखूया पुचः रामसार धलखय् दुथ्यानाच्वंगु दु । सिमसार लागा धायेबले प्राकृतिक बाय् कृत्रिम रुपं दयेकातःगु स्थायी बाय् अस्थायी कथं लःखं तपुनाच्वंगु, लः बाः वनाच्वनीगु बाय् क्वब्वालःया हुनिं जुयाच्वंगु दलदल, धाप, जरुवा लागा बाय् चिलूगु बाय् क्षारयुक्त लः दूगु थाय् बाय् भूगोलयात थुइके फइ । नेपाःया राष्ट्रिय सिमसार नीति, २०६९ कथं सिमसार धाःगु लः मुनाच्वंगु बाय् बाः वनाच्वंगु, स्थायी बाय् अस्थायी, प्राकृतिक बाय् कृत्रिमकथं दयाच्वंगु दलदल लागा खः । नेपाः छगू पर्वतीय देय् जूगु व थन लः, जमिन, जङ्गल, वनस्पति लिसें खनिज पदार्थ थुजाःगु प्राकृतिक स्रातेतयेगु भण्डार दयाच्वंगु दु । नेपाःया मुक्कं क्षेत्रफलया च्यागू लख १९ द्वः निसः व ७७ हेक्टर (थ्यंमथ्यं न्यागू प्रतिशत) सिमसार लागां तपुनाच्वंगु दु । नेपाःया तराई, पहाड व हिमाली लागाय् अन्तर्राष्ट्रिय महत्वं जाःगु सिमसार लागात लानाच्वंगु दु ।