वाङमय शताब्दि पुरुष सत्यमोहन जोशीयाबारे दयेकातःगु म्वाना च्वंगु इतिहास नांयागु डकुमेण्ट्री व डकुमेण्ट्री दयेकुगु इलय् मुंकुगु शताब्दि पुरुष लिसे स्वापु दूगु जीवनी ताहाकःगु श्रव्यदृश्य भिडियो आशा सफू कुथियात छगू ज्याझ्वःया दथुइ लःल्हागु दु ।
सत्यमोहन जोशी वृत्तचित्र निर्माण समितिया कजि नेपालभाषा एकेडेमीया सदस्य सचिव डा पुष्पराज राजकर्णिकार या सभानायसुइ जूगु उगु ज्याझ्वलय् नेपालभाषा एकेडेमीया भाइस चान्सलर साहित्यकार मल्ल के सुन्दर मूपाहाँ कथं झायादीगु खः ।
ज्याझ्वलय् सत्यमोहन जोशी वृत्तचित्र निर्माण समितिया छ्यान्जे शाक्य सुरेनं लसकुस न्वचु तयादीगु खःसा ज्याझ्वलय् आशा सफू कुथिया छ्यान्जे व च्वसापासाया नायः भुषणप्रसाद श्रेष्ठ व वरिष्ठ संकिपा पत्रकार विजयरत्न असंबरे विशेष पाहाँ कथं झायादीगु खः
उगु ज्याझ्वलय् नुगःखँ तयादीपिन्सं इतिहासय् ज्वमदुगु योगदान दुम्ह शताब्दि पुरुष लिसे स्वापु दूगु डकुमेण्ट्री व भिडियो थुकथं नेपाःया नांजागु सफू कुथि आशा सफू कुथियात लःल्हागु खँयात बाँलागु पलाः धका धासे छुं नं एेतिहासिक महत्वंजाःगु भिडियो संरक्षण यायेगु ज्यां अध्ययन अनुसन्धान याइपिनिगु निंतिं तधंगु ग्वाहालि जुइगु खँय् वक्तापिन्सं बःबियादिगु खः ।