जःलाखःला देय् भारतया सिक्किमय् च्वंगु राष्ट्रिय भाषा एवं संस्कृति बिद्यालय, गान्तोकया ब्वनामिपिन्त वंगु म्हिगः मंगलवाः येँय् लसकुस याःगु दु ।
बिद्यालयया प्रमुख बिकास प्रधानया नेतृत्वय् वःपिं नीम्हेसित येँया तजिलजि गुथि, नेपाःपाखें लसकुस याःगु खः । लसकुस यायेगु झ्वलय् नेवाः परम्परा कथं तजिलजि गुथि नेपाःया नायः राजु नापित, न्वकू शान्तकुमार महर्जन, छ्याञ्जे सन्धिर महर्जन, दांभरि तुलसा श्रेष्ठ, दुजःपिं सुनिता महर्जन व प्रनिमा नापितं खादां न्ययेका ख्येँ सगं ब्यूगु खः ।
उगु हे ज्याझ्वलय् जीवित कुमारी संस्कृति संरक्षण, संवद्धन नापं प्रचारप्रसार यानाच्वंगु ह्यूमत मिसा पुचःनाप म्हसिका कालबिल याःगु खः । पुचःया नायः मचानानी महर्जनं पदाधिकारीया म्हसिका ब्यूसें पुचलं कुमारी संस्कृति संरक्षणय् यानावयाच्वंगु ज्याझ्वःया बारे जानकारी बियादीगु खः ।
नेपाःया धार्मिक, सांस्कृतिक व ऐतिहासिक सम्पदा नापं नेवाः तजिलजि अध्ययनया नितिं शैक्षिक भ्रमणय् वःपिन्त लसकुस लिपा गुथिया नायः राजु नापितं नेवाः भ्वय्या बारे जानकारी बिसें सकलसित भ्वय् नं नकूगु खः । भ्वय् लिपा बिद्यालय प्रमुख विकास प्रधानं तजिलजि गुथि, नेपाः व ह्यूमत मिसा पुचःयात सुभाय् ब्यूसें भ्वय्या जानकारी ब्वनामिपिन्त तःधंगु उपलब्धि जुइगु धयादिल । वय्कलं नेपाः भ्रमणय् वःपिन्सं न्हापांगु खुसिइ नेवाः भ्वय्या अनुभव याःगु धयादिसें लसता प्वंकादिल । नापं बिकास प्रधानजुं तजिलजि गुथि, नेपाःयात मतिनाया चिं लःल्हानादिल ।
लसकुस यायेगु ज्याझ्वःन्ह्यः ब्वनामिपिन्सं येँया बसन्तपुरय् राजकीय कुमारी दर्शन याःगु खः । न्यान्हूया नेपाः भ्रमणय् वःपिं ब्वनामिपिन्त माःकथंया फुक्क व्यवस्था यलया ज्यापू समाजं याःगु खः ।