उर्मिला डंगोल
गंगा साहूया तिरिमय्जु स्वीनिता लछिं लाःम्ह जूगुलिं गंगा साहू इहिपा लिपा झन् झन् व्यापार बांलाना वल । वय्कःपिन्त छुं कथंया दुःख मदु । काय् म्ह्याय् नं उलि हे बांलाः । काय् म्ह्याय् निम्हं विदेशं लिहाँ वल, ब्याहा यायेत ।
काय्यात नं ब्यू वःपिं ग्वाः ग्वाः । म्ह्याय्यात नं धाः वःपिं ग्वाःग्वाः । म्ह्याय् ब्याः याये मखु धकाः घुं कया च्वंम्हेसित थुलि सम्पत्ति बी, थज्याःगु थज्याःगु तिसा बी धकाः क्यनाः ब्याहा यायेत राजी जुइकल ।
म्ह्याय्म्हेस्यां तिसा वसः दयेकुदयेकुं वन । हिरा जवाहरात दयेकु दयेकुं वन । मुद्दति बचतय् नं बौम्हेसिनं ध्यबा तयाबिल ।
ब्याहायागु तरखरं छेँय् भोछिसियां लिमलाः । ब्या न्ह्यःने वःलिसे झन् झन् फुक्कसियां लिमलाः ।
कार्ड छापे यायेगु ई त्यल । उखे भाःतपिन्थाय् ला कार्ड छापे यानाः इनेगु ज्या नं जुइ धुंकल । कार्ड इनेगु ज्या जूगु सिइवं गंगा साहूया म्ह्याय् मतिना थःके दुगु फुक्क तिसा वसः ज्वनाः थःम्हं ययेका तयाम्हलिसे बिस्युं वना बिल । सुनां नं उमित नापलाके मफु ।
उखे कार्ड इने धुंकल । भ्वय् छवाः जक मानि । भमचा बिस्युं वंगु खँ सिइवं आछु आछु जुल । फुक्क जानाः हाकनं मेम्ह भमचा स्वल । तै इलय् हे मेम्ह मिसा लुल । व हे इनेधुंकूगु कार्डं हे ब्याहा यानाछ्वत । इज्जत बचय् जुल ।
लिपा म्ह्याय् छेँय् वःगु खनेसात कि मांम्हेसिनं वयागु लागि छेँया मू लुखा हे बन्द यानाबिल ।