सिकालि अजिमाया देवगणय् च्याम्ह दुहाँ वःगु लसताय् देय् भ्वय्

स्वनिगःया छगू ऐतिहासिक व मौलिक बस्तीकथं म्हसीका वयाच्वंगु खोनाय् आइतवाः सिकालि अजिमाया देवगणय् ल्याय्म्हपिं च्याम्ह दुहाँ वःगु लसताय् देय् भ्वय् न्याय्कूगु दु ।
खोकनावासीया उत्सवय् उपप्रधान लिसें गृहमन्त्री नारायणकाजी श्रेष्ठलिसें संघीय, प्रदेश सांसद्, स्थानीय तहया जनप्रतिनिधिपिनिलिसे द्वलंद्वः खोनाया बासीपिनि ब्वति दुगु ज्याझ्वलय् खोनाया मौलिक बस्ती व संस्कृति खनाः दंग जूगु खः ।
रुद्रायणी द्यो गं  ४६ म्ह देवगण मदय्कं अन दँय्दसं मोहनीया इलय् जुइगु रुद्रायणी, सिकाली या मूजात्रा व मेमेगु जात्रा न्ह्याइमखु । इन्जिनियर, कम्प्युटर विज्ञान ब्वनाः थीथी पेशाय् न्ह्यज्यानाच्वंपिं च्याम्ह ल्याय्म्हत धार्मिक, सांस्कृतिक नीति नियम पालना यानाः द्यःगणय् दुहाँ वःगु दु । देवगणय् दुहाँ वःपिं ४८ दँनिसें १८ दँया ल्याय्म्हत दु । देवगणय् दुहाँ वःपिं बुद्धिरत्न डंगोल, केशराम महर्जन, गोविन्द महर्जन, किशोर महर्जन, देवाकर महर्जन, नारायण महर्जन, देवलाल महर्जन व आर्यन महर्जन जुयादी ।
थ्वहे झ्वलय् यल महानगरपालिका– वडा नं २१ या संयोजनय् द्यगणया हना, धार्मिक विधिं सगं बीगुलिसें खोनाय् हे न्हापांखुसी ‘देय् भ्वय्’ नकेज्या जूगु दु ।
भ्वय्या व्यवस्थापननिसें कयाः फुक्ककथंया ग्वाहालि याय्त खोनाया सकलें मनूत सिकाली अजिमा देगः जःखः मुंगु खः । उगु भ्वजय् ७ द्वलं मल्याक मनूतय् ब्वति दुगु ग्वसाःखलकं धाःगु दु ।
खोनाया मौलिक संस्कृति संरक्षणलिसें लसता प्वंकुसें उपप्रधान लिसें गृहमन्त्री श्रेष्ठं खोनाया मौलिक, संस्कृति, पहिचानया संरक्षणय् न्ह्यज्यानाच्वनादीपिं द्यःगंयात औपचारिक सम्मान जक बीगु मखु कि प्रोत्साहनया निंतिं विशेष व्यवस्था याय्माःगु खँय् बः बियादिल । द्यःगणं थनया संस्कृति ल्यंकेत महत्वपूर्ण योगदान बियावयाच्वंगुया कदर यासें संघ, प्रदेश व स्थानीय तगिमं द्यःगंयात प्रोत्साहित याय्माःगु उपप्रधानमन्त्री श्रेष्ठं कनादिल ।
वय्कलं खोनाया मौलिक बस्तीया संरक्षण यासें म्हसीका व सम्पदा ल्यंकेत सरकार गम्भीर दुगु न्ह्यथनादिसें खोनाया मौलिक बस्तीइ लिच्वः मलाइकथं फास्ट ट्राय्कया आयोजना न्ह्यज्याकेमाःगु खँय् सरकार गम्भीर दुगु खँ कनादिल । नेपाःया संस्कृति ल्यंकेत खोनाबासीं बियावयाच्वंगु उपप्रधानमन्त्री श्रेष्ठया धापू दुगु खः ।
उगु लसताय् पूर्व सांसद् पम्फा भुसालं खोनाया मौलिक बस्तीयात लिच्वः मलाइकथं फास्ट ट्राय्कया योजना न्ह्यज्याकेगु खँय् रक्षामन्त्रीया संयोजकत्वय् च्वंगु समितिं दय्कूगु प्रतिवेदन कार्यान्वयन याय्माःगु माग यानादिल ।
२१ वडाया वडाअध्यक्ष रविन्द्र महर्जनया सभापतित्वय् जूगु ज्याझ्वलय् यल महानगरपालिकाया मेयर चिरिबाबु महर्जन, भक्तपुर नगरपालिकाया मेयर सुनील प्रजापति लिसें विशिष्ट व्यक्तित्वपिनि ब्वति दुगु खः ।