सक्वया नादि खुसिइ दँय्दसं जुइगु माधवनारायण स्वस्तानी व्रत थुगुसी विधि जक पूवंकाः हनीगु जूगु दु ।
कोरोना संक्रमण जोखिम व सरकारं लागु याःगु स्वास्थ्य मापदण्ड पालना यानाः माधवनारायण व्रतया नित्य पूजा व धार्मिक विधि जक पूवंकेगु माधवनारायण व्रत तथा शालीनदी सुधार समितिं न्ह्यथंगु दु ।
लच्छितक धलं दनेत सक्वय् वइपिं व्रतालुपिनि लगत सङ्कलनया निंतिं नां दर्ता व थाय्या व्यवस्थापन यायेगु समितिया नायः मिजेन्द्रकाजी श्रेष्ठं कनादिल । व्रतालुपिन्त सक्वं पशुपति, फम्पि, पन्ति व चांगुइ यंकेगु झ्वलय् माःगु हलंज्वलं ल्ह्ययेत गाडीया व्यवस्था यानातःगु दु । माल धाःसा एन्टिजेन परीक्षणया व्यवस्था तकं समितिं हे याइगु धाइगु दु ।
थुगुसी थ्व हे वइगु माघ ३ गतेनिसें माधवनारायण व्रत न्ह्याइ ।
