नेपालभाषा साहित्य व पत्रकारिता ख्यलय् ज्वःमदुम्ह व्यक्तित्व सुरेश किरण मानन्धर मदुगु बुखँ वःगु दु ।
थाैंकन्हय् भाषा आयोगया दुजःकथं ज्या यानाच्वनादीम्ह मानन्धर थ्व हे फागुन २५ गते साेमवाः आकाझाकां मदुगु छेँजःपिसं कंगु दु ।
लिपांगु इलय् नेपालभाषा टाइम्सया सम्पादककथं ज्या यानाच्वनादीम्ह वय्कः भाषा आयोगय् मनाेनित जुइवं सम्पादकपदं राजीनामा बियादीगु खः ।
नेपालभाषा साहित्यय् आधुनिक कविकथं नांजाःम्ह मानन्धरया च्वखँ, ख्यालः, नाटक विधाय् नं उतिकं हे ल्हाःच्वःम्ह व्यक्तित्व खः ।
मानन्धरया घण्टाघरं जिके इ न्यनाच्वन चिनाखँ संग्रह तसकं चर्चित चिनाखँ मुना खः । वय्कलं छगू इलय् मह संचारया निंतिं नं टेलिप्याखं च्वयेगु ज्या यानादीगु खः ।
मदुम्ह मानन्धरयात अन्तिम श्रद्धाञ्जली देछाकथं कन्हय् सुथसिया ९ बजेनिसें १२ ताः ईतक नेपालभाषा मंकाः खलःया छेँ बिज्यासलय् तइगु जूगु दुसा अन्तिम श्रद्धाञ्जली देछा लिपा मंकाः खलकं बिज्यासः, धलक्व, छत्रपाटी, त्यंगः, थाय्मदु, असं, बालकुमारी, जनबहाः, किलाघः, न्यत, त्यंगः, कुलांभुलु, ताम्सिपाः जुयाः लुतिइ तक शव यात्रा याइगु नेपालभाषा टाइम्सं जानकारी ब्यूगु दु ।
ने.सं. १०८६ काैलागाः १० स जन्म जुयादीम्ह मानन्धरया जहान व निम्ह काय्पिं दु ।