नेपालभाषा संगीतया ख्यलय् नेवाः साधना कला केन्द्रया ग्वसालय् याकनं हे नेवाः साधना संगीत सिरपा जुइत्यंगु दु । थुगु सिरपाः ज्याझ्वःया जःखः च्वनाः न्हाय्कं अनलाइनपाखें ज्याझ्वःया ग्वसाःखलः कजि सुन्दर श्रेष्ठ (बागमती भाइ)लिसे जूगु खँल्हाबल्हा थन न्ह्यब्वयाच्वना । सं.
नेवाः साधना संगीत सिरपाः ज्याझ्वः गुज्वःगु ज्याझ्वः खः ?
नेवाः साधना संगीत सिरपाः ज्याझ्वः नेवाः संगीत साधनाय् न्ह्यज्यानाच्वंपिं संगीतकःमिपिन्त हःपाः व तिबः बिइगु ज्याझ्वः खः । थुगु ज्याझ्वः नेवाः भाय्या विकास व प्रवद्र्धनया आज्जुं जिमिसं न्ह्याके त्यनागु खः ।
नेपालभाषा संगीत ख्यलय् नेवाः स्टार अवार्ड, पेजथ्री पिपल्स च्वाइस अवार्ड थुज्वःगु अवार्ड न्हापा हे दु । हाकनं न्हूगु अवार्डया आवश्यकता छाय् जुल ?
खः, थी थी अवार्ड न्हापा हे दयाच्वंगु दु, तर थुकी नेवाः संगीत ख्यःयात खःकथं प्रतिनिधित्व मजूगु वाःचायेकाः थुगु नेवाः साधना अवार्डया घोषणा जूगु खः । मेगुली भोटिङ्ग याकाः जुइगुलिं छम्हस्यां हे अप्वः भोटिङ्ग याकीगु व ध्यबा फुकाः भोटिङ्ग याके मफुपिं थुकी प्रतिनिधित्व मजूगु तायेकाः जिमि थुखेपाखे न्ह्यानागु जुल । संगीत ख्यलय् खःकथं न्ह्यचीकेकथं नं थुगु ज्या यायेत्यनागु खः ।
मुक्कं संगीत ख्यःयात जक कःघानाः अवार्ड यायेगु धयादिल । थौंकन्हय् म्ये न्यनेगु स्वयां स्वयेगु हे अप्वः जुयावःगु दु । म्यूजिक भिडियोयात छाय् दुथ्याका मदिया ?
जिमिसं आःयात संगीत ख्यःयात हे जक कःघायेगु बिचाः याना । छपु बांंलाःगु मे मदयेकं मेगु लँपु चाली मखु । थुखेपाखे जिमिसं लिपा हे जक पलाः छीगु जुइ । दक्वं छक्वलं यायेबलय् सही मूल्यांकन जुइत नं थाकुइ थें तायेकागु जुल ।
थुगु अवार्ड ज्याझ्वलं नेपालभाषा सांगीतिक ख्यलय् गुकथं तिबः बीगु तायेका दिया ?
नेवाः संगीत ख्यलय् दुबिना च्वनादीपिन्त छगू दबू चूलाइगु व थुकिं बांलाःपि संगीतकःमिपिन्त हःपाः बीगु जिमिगु आज्जु खः । साधकपिन्त साधनाया लिसें हःपाः नं माः, गुगु थुकिं चूलाका बीगु तायेका ।
थुगु अवार्डय् ब्वति कायेगु निंतिं छपु म्ये वा छम्ह संगीतकःमिं छु यायेमाः ?
थुगु अवार्डय् ब्वति कायेत थःपिनि मेया अडियो बाय् भिडियो रेकर्ड यानाः निद्वः दां दुतिना ल्हापं लिसें दुतिने माः ।
अवार्डया नामय् ट्रफी जक दइगु खः कि प्रोत्साहनकथं नगद सिरपाः नं दइगु खः ?
ट्रफिया लिसें नगद सिरपाः नं दइ । तर नगद सिरपाः गुलि जुइ धइगु घोषणा धाःसा लिपा हे जक यायेगु जुइ ।
अवार्ड त्याकीगुया लिधंसा (आधार) छु खः ?
अवार्ड त्याकीगु मू लिधंसा हे निर्णायक मन्डलया निर्णय हे खः ।
गुगुं नं ज्याझ्वः ताःलाकेगु निंतिं आर्थिक पक्षं नं उतिकं हे महत्वपूर्ण भूमिका म्हिती । थुगु ज्याझ्वःया आर्थिक पक्षया व्यवस्थापन गुकथं याना दी ?
खः, छुं नं ज्याझ्वःया निंतिं आर्थिक पक्षं हे महत्वपूर्ण भूमिका म्हिती । जिमिसं ब्वतिकाइपिनिपाखें कायेगु निद्वः दां, ज्याझ्वः जुइबलय् टिकटपाखें वइगु दांया लिसें माःकथं स्पोन्सर मालेगु कुतः नं यानाच्वनागु जुल ।
अवार्ड न्ह्याकेगु पुचलय् सु सु दुथ्याः ? अले वय्कःपिनि भूमिका छु छु दु ?
अवार्डया ग्वसाः ला थुगु नेवाः साधना कला केन्द्रपाखें हे जुइ । जिमिसं निर्णायक मन्डलय् च्वनादीपि नां धलः धाःसा लिपा हे जक पित ब्वयेगु जुइ ।
संचार ख्यःया थुगु अवार्डय् गुकथंया भूमिका दइ ?
थुगु अवार्ड ज्याझ्वःया निंतिं सन्चार ख्यःया ज्वः मदुगु भूमिका ला दुगु हे जुल । थुकियात फचिं फत्तले यक्वसिथाय् थ्यंकाः वय्कःपिन्त ब्वति कायेके बीगु व यक्वसिनं ब्वति कालकि जक थुगु ज्याझ्वः ताःलाइगु जुयाः थुगु ज्याया भाला धात्थें धायेगु खःसा छिकपिं थें जाःपिनिगु ब्वहलय् हे लानाच्वंगु दु ।