प्रदेश सरकारयात शिक्षाया लागि अधिकार मदुगु धासें शिक्षा क्षेत्रया विकासया लागि प्रदेश सरकारं नं योगदान बिईत तयार दुगु बागमति प्रदेशया मुख्यमन्त्री शालिकराम जम्मरकट्टेलं धयादिल ।
थौं जुगु ज्ञानोदय माध्यमिक विद्यालयय् बिदाई, सम्मान व आईसीटी ल्याब उलेज्या झ्वलय् वय्कलंं थुगु खँ धयादीगु खः । वय्कलं नेपाःया मुख्य पेशाया रुपय् दुगु कृषि क्षेत्रया विकासया लागि शिक्षाय् हे कृषि विषयया पठनपाठन जुइमाःगु आवश्यक दु धयादिल । प्रदेश सरकारं थुकिया निंतिं आह्वान यानाबलय् प्रस्ताव मवःगुलिं दुःख प्वंकुसें ज्ञानोदययात धादिङय् कृषि विद्यालय संचालन याय्त आग्रह यानादिल । थुकिया लागि थःम्हं माक्व ग्वाहालि यायेत तयार दुगु नं कनादिल ।
ज्याझ्वलय् विशेष पाहाँकथं झाःम्ह प्रतिनिधि सभाया सांसद विराजभक्त श्रेष्ठं थःगु छेँ नाप दुगु विद्यालयया उन्नतिइ थः लय्तायागु खँ कनादिल । वय्कलं ब्वँमिपिन्त अनुशासित जीवन हनेत आग्रह यासें सकलें अनुशासित जुयाः न्ह्यज्याःसा जक देय्या विकास जुइ धयादिल ।
ज्याझ्वलय् विशेष पाहाँकथं झाःम्ह येँ मनपाया उपमेयर सुनिता डंगोलं विद्यार्थीं जीवन चुनौतिपूर्ण जुइगु व विद्यालयय् च्वनेबलय् थःत विद्यालय यइमखु तर त्वतेधुंकाः हाकनं शिक्षकपिं नाप लाय्मास्ति वइ धैदिल । वय्कलं औपचारिक शिक्षाया लिसें थःगु रुचिया ख्यलय् नं पलाः न्ह्याकावं च्वंसा जक थःगु आज्जुइ थ्यंके फइगु खँय् नं बः बियादिल ।
केन्द्रीय शिक्षक संघया दुजः सुन्दर पन्तं ज्ञानोदय मा.वि. नेपाया हे उत्कृष्ट विद्यालय मध्ये उत्कृष्ट विद्यालय जुइत ताःलाःसां नमूना विद्यालय घोषणा जुइमफुगु छगु दुःखया खँ खः धयादिल । अथेहे शिक्षाया ऐन विकृति विसंगति चिकेत शिक्षक व विद्यार्थीपिं सक्रिय जुइमाःगु धयादिल ।
अथेहे अखिल नेपाल शिक्षक संघया अध्यक्ष शंकर अधिकारीं शुभकामना मन्तव्य तयादिसें ज्ञानोदय मा.विं नेपाःया सामुदायिक विद्यालय नं गुणस्तरीय दुगु प्रमाण प्रस्तुत यानादिल ।
ज्याझ्वलय् राष्ट्रिय परीक्षा बोर्डया अध्यक्ष महाश्रम शर्मां नमुना विद्यालयया लागि जग्गाया खं यानाः नं विद्यालय उत्कृष्ट जुया नं नमुना विद्यालय जुइ मफुगुलिं प्रावधान सचे याय् माःगु खँ कुलादिल । परीक्षाय् वइगु ग्रेड स्वयां नं व्यावहारिकता व शिक्षाया सही सदुपयोग जू कि मजू धइगु खँ महत्वपूर्ण जुइगु खँ वय्कलं कनादिल ।
ज्याझ्वलय् येँ मनपा १३ वडाया दुजः रामबाबु कोइराला, कामपा शिक्षा विभागका प्रमुख राम प्रसाद सुवेदी, समाजसेवी सुमन साय्मि, यशोधरा छात्रवृत्तिया दाता यशोधरा पन्त लगायतपिन्सं ब्वमिपिन्त सुभाय् देछाःगु खः ।
वहे ज्याझ्वलय् ब्वनेकुथियात नेपाःया हे उत्कृष्ट ब्वनेकुथिकथं धस्वाकेत ग्वाहालि यानादीपिं स्यनामिपिन्त हनापौ लःल्हासें हंगु खःसा २०७६, ७७ व ७८ सालय् +२ उत्कृष्ट ल्याः हःपिं ब्वमिपिन्त यशोधरा छात्रवृत्ति लःल्हाःगु खः
ज्याझ्वलय् मूपाहाँलिसें विशेष पाहाँपिसं ज्ञानोदय हेराल्डया नं विमोचन याःगु खः ।
विद्यालय व्यवस्थापन समितिया नायः उर्मिला मालीया सभापतित्वय् जूगु ज्याझ्वलय् प्रधानाध्यापक नातिकाजी महर्जनं सकसितं लसकुस यासें ज्याझ्वःया बारे व विद्यालयया बारे नुगःखँ तयादीगु खः ।
