लाइब्रेरी अफ् कभर सङ्गस् ग्रुप नेपाल व लाइब्रेरी अफ नेवाः सिंगर्स म्येगुलु पासा पुचःया ग्वसालय् वंगु जेष्ठ ३१ गते आइतवाः जूगु “फर्ष्ट म्युजिकल एण्ड सिंगर्स ग्याडरिङ” ज्याझ्वलय् नांजाःम्ह म्येहालामि भूपेन शाक्ययात हंगु दु । ग्वसाः खलः लाइब्रेरी अफ् कभर सङ्गस् ग्रुप नेपालया नायः रबिन्सन कंसाकारं जानकारी बियादी कथं सम्मानित जुयादीम्ह म्येहालामि लाइब्रेरी अफ कभर सङ्गग् ग्रुप नेपालया संस्थापक नायः ख, थ्वहे हुनिंनापं भूपेन शाक्यं संगीत ख्यःयात व उगु पुचःयात यानादीगु योगदानयात कदर यासें थथे हनेज्या जूगु। म्येहालामि भूपेन शाक्यं नेपालभाषा संगीत ख्यलय् भ्यलेपुनाः थ्यंमथ्यं १३ दँ न्ह्यंईनिसें नेपालभाषा संगीत ख्यः थपू यायेगु नितिं मदिक्क पलाः न्ह्याकाः वयाच्वनादीगु दु । वय्कलं थीथी नेपालभाषाया म्ये म्येसंकिपा सिर्जना यानाः न्हून्हूपिं म्येहालामि व कलाकारपिन्त नेपालभाषा सांगीतिक कलाकारिता ख्यलय् पलाः न्ह्याका बीकेगु ज्वःमदुगु कुतः यायां वयाचँगु दु । ग्वसाः खलः संस्थाया संस्थापक म्येहालामि भूपेन शाक्ययात संस्थाया आःया नायः कंसाकार व ल्यू नाय सुमन मानन्धरं दोसल्लां न्ययेकाः हनापौ लःल्हाःगु खः । नायः रविन्सन कंसाकारया ल्हाःचिं तयातःगु हना पतिइ धयातःगु दु, “थुगु लाइब्रेरी अफ कभर सङ्गस् ग्रुप नेपाल” पलिस्था यानाः न्हूपिं म्येहालामिपिन्त थःगु कला न्ह्यब्वयेगु व स्थापित जुइगु सुनौलो प्लेटफर्म उपलब्ध याकादीगुलिं संस्थापकयात सुभाय् प्वंकाच्वना, लिसें थुगु ग्रुपयात न्ह्यःने यंकेत छिसं तयादीगु लगाव व समर्पणयात जिमिसं उच्च सम्मान व कदर लःल्हानाच्वना ।
बि।सं। २०८३ जेष्ठ ३१ गते आइतवाः यलया ग्वार्कोय् च्वंगु सिटी चिकेन रेष्टुरेण्टया हलय् जूगु उगु ज्याझ्वलय् थ्यंमथ्यं पीम्ह ४० म्ह म्येहालामिपिन्सं थःथःगु सांगितिक ब्वज्या न्ह्यब्वयेगु ज्या जूगु खः । अथेहे, ज्याझ्वलय् पेजथ्री अवार्डय् थीथी विधाय् अवार्ड त्याकादीपिं कलाकारपिन्त नं हनेज्या याःगु खः । थुगु ज्याझ्वःपाखें संगीतकःमि, म्येहालामि कलाकारपिनिगु दथुइ थःथवय् म्हसीका व न्ह्याइपुगु लकसया कालबिल जूगु जानकारी ज्याझ्वलय् उपस्थितपिन्सं नुगःखँ कनादीगु दु ।
ग्वसाः खलः लाइब्रेरी अफ कभर सङ्गस ग्रुप नेपाल दुने रबिन्सन कंसाकार ग्रूप प्रेसिडेन्ट कथं दुसा भूपेन शाक्य संस्थापक व संयोजकया रुपं दु । अथेहे, फस्ट भाइस प्रेसिडेन्ट कथं जितेन शाक्य, सेकेण्ड भाइस प्रेसिडेन्ट कथं सुमन मानन्धर, सेक्रेटरी कथं मन्जिल शाक्य, ज्वाइन्ट सेक्रेटरी कथं सविना मानन्धर, ट्रेजर कथं अमृतरत्न शाक्य, ज्वाइन्ट ट्रेजर कथं कृष्णा श्रेष्ठ, आयोजक टिम कथं प्रतिमा बज्राचार्य व अमोघवीर बज्राचार्य दु ।
By सुनिता महर्जन
वि.सं. २०६० सालय् मेट्राे एफएमय् सांस्कृतिक मण्डल ज्याझ्वः न्ह्याकाः औपचारिक रूपं सञ्चार ख्यलय् न्ह्यज्यानादीम्ह सुनिता महर्जनजु थ्वयां न्ह्यः नं सन्ध्याटाइम्स न्हिपतिइ इलय्ब्यलय् फिचर राइटिङ यानावयाच्वनादीम्ह खः । सांस्कृतिक मण्डल ज्याझ्वःया निंतिं समाचार संकलन, कार्यक्रम प्रस्ताेता व निर्माणया ज्या यानादीम्ह वय्कलं इलय्ब्यलय् अप्सरा वाःपाै, तिकिझ्याः वाःपाैलिसेंया नेपालभाषाया पत्रिकाय् च्वसु प्रकाशित यानादीगु दु । लिपांगु इलय् मेराे साप्ताहिक पत्रिकाय् प्रमुख संवाददाताकथं ज्या यानाच्वनादीगु दु । नेवाः संचार ख्यलय् मिसातय् उपस्थितियात सशक्त दय्के माः धइगु तातुनां वय्कःया हे पहलय् न्हाय्कं डटकम न्ह्याकादीगु दु । वय्कः थाैंकन्हय् नेवाः पत्रकार राष्ट्रिय दबूया केन्द्रीय ल्यूछ्याञ्जे जुयादी सा आदिवासी जनजाति पत्रकार महासंघ (फोनिज)या नं पूर्व केन्द्रीय दुजः जुयादी ।