नेवाः पत्रकार राष्ट्रिय दबूया गोरखा जिल्ला अधिवेशन जेठ १५ गते शुक्रवाः क्वचाल । दबूया न्याक्वःगु तःमुँज्यां हिरालाल श्रेष्ठयात सर्वसम्मत नायः ल्यःगु दु ।
दबूया राष्ट्रिय महाधिवेशन भदौ १९, २० गते गाेरखाय् यायेगु याेजना कथं दबूया न्हापांगु जिल्ला अधिवेशन गोरखा जिल्लां न्ह्याकूगु खः ।
भिमसेन थापा गाउँपालिकाय् वडा नं. ५ स च्वंगु मिलन बस्तीया सामुदायिक सहिद स्मृति सभाभाहलय् जूगु अधिवेशनं हिरालाल श्रेष्ठया नेतृत्वय् ७ सदस्यीय जिल्ला कार्यसमिति व छम्ह गण्डकी प्रदेश पार्षद प्रतिनिधि निर्विरोध निर्वाचित जूगु दु ।
दबूया केन्द्रिय नायः नृपेन्द्रलाल श्रेष्ठया मूपाहाँसुइ जूगु अधिवेशनय् गोरखा जिल्लाया भौगोलिक क्षेत्र तःधंसां व्यवसायिक संचारकःमिपिनि ल्याः म्हो जूगु धासें थनया संस्कृति व मातृभाषा संवर्द्धन अले प्रवर्द्धन यायेत केन्द्र व जिल्लाया सहकार्य दइगु न्वचुमिपिसं प्रतिबद्धता प्वंकूगु दु
जिल्ला नायः भिमसेनबाबु श्रेष्ठया सभापतित्वय् प्रेस सेन्टरया केन्द्रिय उपाध्यक्ष दिपक श्रेष्ठ ‘जलनं’ न्ह्याकूगु ज्याझ्वलय् केन्द्रिय सल्लााहकार राजु शाक्य, न्वकू सुरेन्द्र भक्त श्रेष्ठ, मूछ्याञ्जे के के मानन्धरपिसं दवूया आज्जु व अभियानया निरन्तरताया औचित्यया खँ न्ह्यथानादीगु खः । ज्याझ्वलय् गोरखाया वरिष्ठ पत्रकार कैलाश बाबु श्रेष्ठ व भिमसेन थापा गाउँपालिका वडा ५ या नायः होम बहादुर बरामुं जिल्लाया वस्तुस्थितिया जानकारी लिसें थनया जनजीवनया प्रवर्द्धनय् संचारया भूमिकाया महत्वबारे नुगःखँ तसें दबूया आगामी केन्द्रिय महाधिवेशनय् ग्वाहालि व सहकार्यया प्रतिबद्धता प्वंकूगु दु ।
न्हूगु ज्यासना पुचलय् न्वकू आत्मा राम श्रेष्ठ, छ्याञ्जे विनाेद बाबु श्रेष्ठ, दांभरिं लक्ष्मी श्रेष्ठ ल्यःगु दुसा दुजलय् कथहं लक्ष्मी श्रेष्ठ, राजकुमार श्रेष्ठ व मनाेज श्रेष्ठ ल्यःगु दु । गण्डकी प्रदेश पार्षद प्रतिनिधिइ अन्जन श्रेष्ठ निर्विरोध निर्वाचित जूगु दु ।
ज्याझ्वलय् नेवाः पत्रकार राष्ट्रिय दबूया केन्द्रीय दांभरिं बाबुकाजी साछेँ श्रेष्ठ, ल्यूछ्याञ्जे सुनिता महर्जन, गण्डकी प्रदेश संयोजक उत्तम कुमार श्रेष्ठ, दुजःपिं अनिता महर्जन व राजेश शाक्य पाहाँकथं झायादीगु खः ।