पृथ्वी राजमार्गअन्तर्गत चितवनया मुग्लिङ–मलेखु सडकखण्डया प्यपु ताँ वइगु असारनिसें चायेकेगु यानाः ज्या न्ह्याकूगु दु । उपिं ताँया सामान्य बाहेकया ज्या क्वचाये धुंकूगु दु।
नागढुङ्गा–मुग्लिङ सडक आयोजना पश्चिम खण्ड कार्यालयया सूचना अधिकारी सचेन्द्र मिश्रयाकथं खहरे खुसि, चिरौँदी खुसि, गोमती खुसि व हुग्दी खुसिया ताँ असारदुने चायेकेत्यंगु खः । वय्कःयाकथं उपिं ताँ मध्ये गुलिखेया लँलिसे स्वायेगु लँ दयेके ल्यं दनि । ताँया प्लाष्टर, लंपुं छायेगु, ट्राफिक सुरक्षालिसेंया सामान्य ज्यात ल्यं दनि ।
वय्कलं धयादी, “समग्रय् ९० प्रतिशत स्वयां अप्वः ज्या जूगु दु । जिमिसं असारदुने ताँ चायेकेगु तयारी यानाच्वनागु दु ।”
उगु हे ब्वया हुग्दी व चरौँदी खुसिया ताँ निर्माणाधीन दु । हुग्दीया ३० प्रतिशत व चरौँदीया ५० प्रतिशत ज्या जूगु वय्कलं कनादिल। उगु ताँया बँ व थांया ज्भुया जुयाच्वंगु दु । उगु सतक ब्वय् अलकत्रा मगानाः दिनाच्वंगु कालाेपत्रया ज्या यायेगु तयारी न्ह्याकूगु दु ।
मिश्रयाकथं निर्माण कम्पनीं छन्हु निन्हु दुने अलकत्रा वइगु व कालोपत्र याये क्वचाइगु धाःगु दु । वय्कःयाकथं सबबेस तये धुंकूगु करिब दुई किलोमिटर सतकय् बेस तयाः कालोपत्र यायेगु तयारी याःगु दु । थ्व दयेकाच्वंगु थप थाय् कालोपत्रया तयारी याये फइगु वय्कलं कनादीगु दु । अलकत्राया भाः थहाँ वनाः मवसेंलि थन कालोपत्रया ज्या दिनाच्वंगु खः । धः दयेकेगु, रेलिङलिसेंया ज्गाया धाःसा जुयाच्वंगु वय्कलं कनादिल । सडक निर्माणया ज्या ४३ प्रतिशत क्वचाःगु दु । उगु ब्वय् ३८ दशमलव ८६ किलोमिटर सतक लाः । थ्व ब्वय् निगू फुति निगू किमी खुगू लेनया सतक बने जुइ । गुगु मलेखु, बेनीघाट व मुग्लिन ब्वय् लाः । न्हस फुति नि किमी सतक प्यंगू लेनया जुइ । प्यंगू लेन न्ह्यइपुगु डाँडा, कुरिनटार, फिस्लिङ, चुम्लिङ, मझीमटार, चरौँदी व विशालटार लागाय् लाः । च्वथ्याःक्वथ्याः ब्वय् स्वंगू लेनया ‘क्लाइम्बिङ’ लँ दयेकीगु जूगु दु । ‘क्लाइम्बिङ’ लँ नि फुति स्व किमीया जुइसा ल्यं लँ निगू लेनया जुइ ।
निर्माण कम्पनीं रु प्यंगू अर्ब ८० क्वःति ५९ लखय् थ्व ब्व स्तरोन्नतिया ठेक्का काःगु खः । लँय् थीथी लागाय् कालोपत्रलिसें धः दयेकेगु, चलः पनेगु निंतिं संरचना दयेकेगु, पःखा चायेगु, पःखाः ग्वयेगु, सडक सुरक्षा, ताँ दयेकेगु ज्या ल्यं दनि । थ्व लँ विश्व बैङ्कया ग्वाहालिं दयेके त्यंगु खः । येँ दुहाँ वयेगु व पिहाँ वनेगु मू लँपुया रूपय् थ्व ब्व दु ।
वंगु पुसय् दयेकेगु म्याद पुले धुंकाः १८३ न्हु तंगु खः । मेगु म्याद थपया निंतिं प्रक्रिया न्ह्याकाच्वंगु दु ।